Tunioù evit staliañ KDE

Ur sturlevr staliañ klok n'eo ket ar bajenn-mañ. Diouer a ra c'hoazh ar seurt levr e brezhoneg. Ma vez amzer gant unan bennak evit kas da benn ar seurt troidigezh, e vo degemeret gant levenez gant an holl arveriaded brezhoneger ! Da c'hortoz em eus savet al linennoù dindan da heul, gant ar spi e c'hello difraostañ  un tamm an dachenn.
Ar gudenn brasañ gant KDE eo e vez diazezet war ur seurt reizhiad korvoiñ n'eo ket hini a vez staliaet ent-eeun peurliesañ war urzhiataer an den. Neoazh abaoe mizioù e teu tamm ha tamm ar reizhiadoù frank er-maez deus ar skeud ma oant bet dalc'het ennañ gant marc'hadourien stlenneg (an embanner meziantoù pennañ peurgetket, Microsoft e anv). Kregiñ a reer da gavout urzhiataeroù staliaet gant Linux ha KDE, ha prest da loc'hañ kerkent ha luget. A-benn ma vije deuet kement-mañ da vezañ un dra boutin, e ranko an darn vrasañ ac'hanomp kas da benn an argezh staliañ ur reizhiad korvoiñ. Pezh n'eo ket ken diaes-se pa heulier an hentenn reizh pazenn ha pazenn.
 

Lankad 1 : staliañ ur reizhiad korvoiñ ar seurt Unix

Hervez doare ho urzhiater e vo ledan pe ledanoc'h an dibab. Ma vez anv eus ur c'horrurzhiataer er-gêr, ar pep aesañ eo dibab ur sederom ma vez kavet warnañ un Unix digoust ha KDE war un dro (Caldera, SuSE pe FreeBSD evit PC, MkLinux ha LinuxPPC evit Mac hag Amiga da skouer). Lod eus ar reizhiadoù-se a c'heller pellgargañ adalek ar genrouedad, hep implij a sederom neuze, hogen ar c'hementad a restroù da engargañ (etre 80 ha 500 Mo) a c'hell ho lakaat diaes. Ret eo c'houzout n'eus netra a vir ouzoc'h a staliañ meur a urzhiataer gant an hevelep sederom, hervez termennoù lezennel ar seurt meziantoù frank. Ma vez anv eus ur post-labour en ho stal, e vo bet staliaet un Unix gant ar saver peurliesañ ; ma ne vije ket kont evel-henn, dav deoc'h gouzout e kaver embannadurioù Linux evit Sun-Sparc ha Digital-Alpha.
 

Lankad 2 : staliañ KDE

Pakit ar restroù a ya d'ober KDE e stumm pe stumm : dre bellgargañ adalek ftp://ftp.kde.org/pub/kde/stable pe unan eus e lec'hiennoù melezour, dindan stumm restroù tarzh da gempunañ, pe dindan stumm restroù binarel ; dre sederom erfin evel ar re meneget a-us, pe lod all c'hoazh a vez renablet war lec'hienn KDE. M'oc'h eus tapetKDE en ur stumm binarel, kefridi merour staliañ ho reizhiad e vo e lakaat e plas. Da skouer rpm eo ar seurt goulev war ar bras eus savennoù Linux. Pa vo kaset da benn an lankad-se, en em gavo ar wezennadur restroù dindan /opt/kde pe /usr/local/kde (diskouezet eo ar renkell-mañ dre ar varienn KDEDIR).
 

Lankad 3 : lakaat KDE da getal an arveriad

Dre ma 'z omp war ur reizhiad Unix, pep arveriad en deus ur gont distag, dezhañ un anv hag ur ger-tremen. Da bep hini dibab (pe get) KDE da endro gorretaol evitañ, dre seveniñ (pe get) an urzhiad
$KDEDIR/bin/usekde

Ne chomo ken nemet kefluniañ KDE evit dibab ar brezhoneg da yezh ar c'hetal (lañser "K" -> "Settings" -> "Desktop" -> "Language" -> "Breton").