 |
Ur
merdeer, ur posteler, ul lenner keleier hag ur flaper prim eo Opera. Un
dazeilad da Internet Explorer ha Outlook Express war un dro eta, pe
c'hoazh da Netscape (deuet dibaoe da vezañ Mozilla, ha ganet
diwarnañ Firefox ha Thunderbird). Diorroet eo abaoe 1995 gant un
embregerezh norvegat, kresket e metoù greanterezh an aerlistri.
Petra eo perzhioù dibar Opera e berr gomzoù ? Klasket ez
eus bet sevel ur merdeer
skañv, e seurt ma yafe en-dro war savennoù n'int ket eus
ar re galloudusañ tout. Bet eo bet an hini fonnusañ a
gaved war ar marc'had, hervez
e aozerien. Hegerz eo war korrurzhiataerioù, re ar rummad PC
dindan
Windows pe dindan Linux, kement ha re re ar rummad Mac, war
stalennoù labour dindan Unix, ha zoken war pellgomzerioù
hezoug.
Un droidigezh klok e peder yezh keltiek
(iwerzhoneg, gouezeleg Skos, kembraeg ha brezhoneg) a oa bet kaset da
benn er bloavezhioù 2000-2001 diwar intrudu Burev
Europat ar Yezhoù Ledet Nebeutoc'h, e framm ur raktres DART e
anv, da bal dezhañ pourchas d'ar minorelezhioù
ostilhoù evit daremprediñ ar Genrouedad en o yezh. Ofis
ar Brezhoneg an hini en doa
savet an droidigezh vrezhonek ; boulc'het gantañ al labour gant
an aozadenn 4.2, eo bet peurc'hraet troidigezh an aozadenn 5.02 (bet
embannet e miz c'hwevrer 2001).
Evel a c'hoarvez alies gant ar seurt raktresoù, ne oa ket bet diawelet al labour ret evit derc'hel an droidigezh e ratre a-feur ma vije embannet aozadennoù nevez (pezh a c'hoarvez ken alies ha div pe deir gwezh ar bloaz). N'eus ket pell 'zo, pa gave din e oa bet graet ul labour a-feson gant an droidigezh-mañ, ha c'hoant ganin tennañ splet anezhañ evit bouetañ labourioù treiñ all war ar stern ganin, em eus kiet e-pad un toullad devezhioù evit treuzfurmadiñ restroù Opera e seurt d'o implijout gant ar meziant treiñ on boas outañ. Goude bezañ deuet a-benn em eus kavet e vije kenkoulz lakaat ar striv-mañ da dalvezout evit Opera ivez, en ur hizivaat an droidigezh anezhañ eta. Skoazell adlenn hag amprouiñ am eus bet gant an Ofis ha gant hiniennoù, setu m'emaon bremañ e stad da ginnig deoc'h un droidigezh klok eus aozadenn ziwezhañ Opera, an hini 9.10.
Kavet e vo amañ :
- Ul liamm davet pennbajenn Opera (e saozneg ha meur a yezh ledet all), e-lec'h ma vez kavet ar meziant da enkargañ evit an holl savennoù ha meur a dra ouzhpenn.
- Skrid (e stumm pajennoù Gwiad) troidigezh « istorel » an aozadenn 5.02 e teir yezh : saozneg, galleg ha brezhoneg.
- Restroù troidigezh vrezhonek an aozadennoł 9.* evit Windows hag evit Linux.
Na dermit ket, grit un amprouadenn. Deuet mat eo ho tivankadennoù hag hoc'h evezhiadennoù, dre bostel :janbarrennig-stagañmaipikdrapiere tinumericablepikfr.